20 Prill 1932, lindi ushtaraku e poeti i ri Trifon Xhagjika

Fill pas prishjes së marrëdhënieve me Bashkimin Sovjetik në Tiranë, u zhvillua gjyqi kundër një grupi të rinjsh, që ishin diplomuar në vendet e Europës Lindore. Ndërmjet tyre ishte edhe oficeri e poeti i ri Trifon Xhagjika, i cili, u dënua me vdekje. Lindi në Peshtan të Tepelenës, më 20 Prill 1932. Kreu Normalen e Elbasanit. Pas diplomimit shërbeu në repartet e artilerisë kundërajrore. Me korespondencë, ndoqi fakultetin e gjuhë-letërsisë. Në moshën 31 vjeçare, emërohet redaktor i teksteve ushtarake, në Ministrinë e Mbrojtjes. Më 1959, u botua vëllimi i tij i parë poetik “Gjurma”. Ai nuk pushoi së vargëzuari edhe në qeli, edhe gjatë proçesit gjyqësor. Shumë prej dorëshkrimeve të tij kanë humbur ose ruhen në dosjet e hetuesisë. Disa të tjera, janë mbledhur në vëllimin “Atdheu është lakuriq” që u botua në vitin 1994.

Referencat:

Thimi Çollaku / Kalendari i botës shqiptare