Faik Konica një nga figurat më të ndritura të kulturës, politikës dhe diplomacisë shqiptare lindi në Konicë, më 15 Mars 1875. Pas përfundimit të studimeve në Francë, kishte mundësi të zinte postet më të larta në administratën turke, si shumë bashkëmoshatarë të tij, por ai zgjodhi rrugën e vështirë të luftës për lirinë dhe përparimin e Atdheut. Duke botuar revistën “Albania”, u bë një ndër themeluesit e gazetarisë shqiptare, por në mungesë të shërbimit diplomatik shqiptar, luajti edhe rolin e përfaqësuesit të kombit tonë në Europë dhe më vonë edhe në Amerikë. Kaq i madh ishte roli i tij në këtë fushë sa që gjyqi perandorak turk, dy herë e ka dënuar Konicën me vdekje dhe ka kërkuar zyrtarisht ekstradimin e tij në Turqi. Në Shtetet e Bashkuara, krahas Nolit, në vitet më të vështira për Shqipërine në krye të Federatës Panshqiptare “Vatra” dhe organit të saj, gazetës më jetëgjatë shqiptare “Dielli”, ai praktikisht u kthye në një kryetar qeverie në mërgim, si në veprimtaritë për të ndihmuar atdheun e rënuar, ashtu dhe në luftën diplomatike për mbrojtjen e tij dhe për shpëtimin nga copëtimi i plotë. Në veprimtarinë e mirëfilltë diplomatike, si përfaqësues i vendit tonë në Shtetet e Bashkuara, ai arriti të bëhet Dekan i trupit diplomatik në Uashigton dhe në kundërshtim me linjën e hapur profashiste që ndiqte Tirana, të ruante dhe të zhvillonte marrëdhëniet e rregullta me partnerin amerikan ku jetonte kolonia më e madhe e mërgimtarëve shqiptarë.
Referencat:
Thimi Çollaku / Kalendari i botës shqiptare
You may also like
-
20 Prill 1881, lindi në Bujan të Tropojës luftëtari i lirisë, Zmajl Hyseni
-
20 Prill 1877, u botua në Bukuresht abetarja”Pellazgjika”, e Vasil Dhimitër Rusos
-
20 Prill 1905, gjyqi turk dënoi Bab Dud Karbunarën për veprimtarinë e tij patriotike
-
20 Prill 1920, u formua në Vlorë, Komiteti “Mbrojtja Kombëtare”
-
20 Prill 1924, Isuf Reçi, plagosi për vdekje Avni Rustemin, një nga krerët e opozitës demokratike