Medalje e Urdhërit më të Lartë Ushtarak të Rusisë
Në vitin 1759 Himarjotët i dërguan letër Perandoreshës Elisabeta të Rusisë. E shkruar në Italisht aty i shprehej Careshës gadishmëria për të luftuar bashkarisht kundër Perandorisë Osmane.
Himarjotët, duke ju përgjigjur thirrjeve të komandantëve, i janë bashkuar forcave ruse dhe kanë marre pjesë në luftërat ruso-turke. Ata u shquan për trimëri dhe burrëri në beteja. Urdhri më i lartë ushtarak i Rusisë mban emrin e Gjergjit të Shenjtë Fitimtar, në nder të tij është pagëzuar me emrin Georgjevskaja edhe një prej sallave madhështore të Kremlinit. Pikërisht në këtë sallë është përjetësuar me gërma të arta edhe emri i një batalioni ushtarak shqiptar.
Për shkak të përndjekjes osmane janë shpërngulur nga Shqipëria dhe sot gjenden të vendosur në Ukrainë rreth 5000 shqiptarë. Ata ende vazhdojnë të ruajnë gjuhën dhe zakonet e vjetra të vendit tonë. Në vitin 1911 Fan Noli ka zhvilluar meshë në kishën e këtij komuniteti, ndërsa në vitin 1979 të njëjtën gjë ka bërë edhe At Liolini i kishës shqiptare të Bostonit në SHBA.